Maau

ميڪسم گورڪيءَ جي لکيل ناول ”ماءُ“ بابت ولاديمير لينن چيو هو ته، ”هيءُ ڪتاب- گهڻو ضروري آهي. گهڻن مزدورن سوچڻ سمجهڻ بنا سڀاويڪ انقلابي هلچل ۾ حصو پئي ورتو ۽ هاڻي اُهي ’ماءُ‘ پڙهندا، جيڪو سندن لاءِ گهڻو فائديمند آهي..... گهڻو وقتائتو ڪِتاب آهي.“ ميڪسم گورڪيءَ جو اصل نالو اليڪسئي ميڪسيمووِچ پيشڪوف هو ۽ هو 28 مارچ 1868ع تي ڄائو ۽ 18 جُون 1936ع تي سوويت يونين ۾ وفات ڪيائين. هو سماجواد حقيقت پسندي ادبي طريقيڪار جو باني ۽ سياسي ڪارڪن هو. 1906ع کان 1913ع تائين ۽ 1921ع کان 1929ع تائين هو پرڏيهه ۾ رهيو، خاص ڪري اٽليءَ جي شهر ڪئپريءَ ۾؛ پنهنجي واپسيءَ تي هُن سوويت يونين جي تڏهوڪين ثقافتي پاليسين کي مڃيو هو، توڻي هُن کي ڏيهه کان ٻاهر وڃڻ جي موڪل نه ڏني وئي هئي. عالمي اَدب جي تاريخ ۾ ڪنهن فنڪاراڻي تخليق کي پڙهندڙن جو ايڏو گهڻو تعداد نصيب نه ٿيو آهي، ۽ نه ئي لکين ڪروڙين انسانن جي قسمت تي انهيءَ جو ايڏو گهڻو ۽ سِڌو اثر پيو، جيترو ميڪسم گورڪيءَ جي هن ڪتاب جو. هيءُ ڪتاب جيتوڻيڪ 1905ع جي پهرئين روسي انقلاب دؤران لکيو ويو هو، پوءِ به اڃا تائين مختلف ملڪن جي پڙهندڙن ۾ مشهور آهي ۽ اُهي کيس پسند ڪن ٿا.